ISTO É UN DESEXO

Desexo ferventemente sorberche os sesos
percibir a capacidade de esquecemento que adoeces
o involuntario dos teus impulsos, que fan de ti
unha especie de caladoiro de soños.
Agora esmoreces de silencios, máis daquela
eras o conxunto de notas que facían unha etnografía perfecta
eras un conxuro que fixo de min a perfecta persoa
incapaz de se auto avaliar
lonxe dos fíos que colgaban dos teus beizos,
dos puntos suspensivos que esparexías polo río
contaxiando a humanidade de intereses propios dun rei midas
tramando segredos, camiños furtivos, calorías de canela
unha luz
transformando en nada,
a inoportuna certeza de sabérmonos SOS.